کلام : امام حسین علیہ السلام

 قلم نے سیکھا ہے یہ وظیفہ ، دعا سے پہلے حسینؑ لکھنا

مرے عزیز و کفن پہ میرے ، قضا سے پہلے حسینؑ لکھنا

کبھی  جو  ذکر  وفائے  غازی  کرو  تو  تاکید  ہے  ہماری 

وفا کے پیکر کے تذکرے میں ، وفا سے پہلے حسینؑ لکھنا

اگر  علیؑ  خدا   جو  ہوتا   تو   لَمیلِد،   لَمیلد   بھی  ہوتا

علیؑ کو رب ماننے سے پہلے ، ذرا  سا  پہلے  حسینؑ  لکھنا

مرض میں کرب و بلا کی مٹی ملو بدن پر شفا  ملے  گی 

مگر یہ ایک شرط ہے بدن پر ، دوا سے پہلے حسینؑ لکھنا 

سعادتِ حج کبھی جو پاؤ سر اپنا سجدے میں تم جھکاؤ

جو رسمِ قرباں ادا  کرو تو،  منیٰ  سے  پہلے  حسینؑ  لکھنا 

ہلالِ  ماہِ  عزا  جو  دیکھو  تو   ایسے  تجدیدِ  غم   ادا  ہو 

سجاکےآنکھوں میں خوں کے آنسو ، عزا سے پہلے حسینؑ لکھنا

علم گھروں پر  سجانے  والو،  حسینی  لشکر کے  با  وفا  کا

علم  پہ مشکیزہ  باندھ  کر  تم ، بُکا سے پہلے حسینؑ لکھنا 

یہی   تقاضۂ    زندگی   ہے   حسینؑ   معراج    بندگی    ہے

کبھی حدیث کساء جو پڑھنا ، کساء سے پہلے حسینؑ لکھنا 

نماز  بولی ،  آذان  بولی ، کسی  کی  کٹ  کر  زبان  بولی

صدا  لگاؤ  علیؑ  علیؑ  کی  صدا سے  پہلے  حسینؑ  لکھنا 

ہر  ابتدا  انتہا  سے  پہلے   ظہورِ   آب  و   ہوا  سے   پہلے 

خدا کی مرضی یہی ہے میری ثناء سے پہلے حسینؑ لکھنا 

مدد علیؑ سے طلب کرو جب عریضہ لکھنے کا قصد ہو جب 

عریضہ لکھ کر پتہ لکھو جب ، پتہ سے  پہلے  حسینؑ  لکھنا

یہ  مانا   ریحان   اعظمی   ہو   ستونِ   شہرِ   سخنوری  ہو 

کرو  ادا  حقِ  منقبت  جب  ، ادا  سے    پہلے   حسینؑ  لکھنا

شاعر اہلبیت: جناب ڈاکٹر ریحان اعظمی