زیرِ خنجر جو ہوئی شہ سے خدا کی باتیں
انبیاء کرنے لگے اپنی بقا کی باتیں
یہ درِ فاطمہ زہرا ہے یہاں عزرائیل
ہاتھ جوڑے ہوئے کرتے ہیں قضا کی باتیں
حوصلیں کیوں نہ ہو تقلیدِ علی اصغر میں
ہر کوئی چاہتا ہے اپنی بقا کی باتیں
حُسن کعبے کا ہے شبّیر کے دم سے قائم
کیسے سجدے نہ کریں خاکِ شفا کی باتیں
دشمنوں نے بھی پڑھے تیرے قصیدے مولا
تیرگی میں بھی ہوئی نورِ خدا کی باتیں
جو غمِ شاہ کے عارف نہ تھے اُن سجدوں کو
حشر میں سُننی پڑی خاکِ شفا کی باتیں
لو تلک بھی نہ ہلی میرے چراغوں کی جناب
کربلا میں بڑی سنتے تھے ہوا کی باتیں
لی ہے ہر سانس محمّد کی حفاظت کے لئے
عینِ توحید ہیں احمد کے چچا کی باتیں
موت کی دُھند میں کھو جاتا وقارِ انساں
ہم جو نیزے پہ نہیں کرتے خدا کی باتیں
دل کو عبّاس کے تسکین کہاں ہوتی ہے
جب تلک کرتا نہیں فرشِ عزا کی باتیں
عبّاس سرسوی
Comments
Post a Comment